គឺ រដ្ឋាភិបាលខ្មែរ នាំ "ត្រីខ្មែរ" ដើរចូល "ជុច" យួនហើយ

ពាក្យសំដីរបស់ “ប្រិយមិត្តជិតខាងដ៏ល្អរបស់ខ្មែរ” ដែលពោលថា : “សាមគ្គីជាប្រពៃណី និង សហប្រតិបត្តិការជានិរន្តរ៍ និង ដោយស្មោះស្ម័គ្រ” ជាករណីយកិច្ចស្វ័យប្រវត្តិមួយ ដែលអ្នកដឹកនាំ កំពូលរបស់កម្ពុជា ដែលស្ថិតនៅក្រោម ការដឹកនាំរបស់ វៀតណាម ជាពិសេសពីសំណាក់អ្នក ទទួលខុសត្រូវ ខាងកងទ័ពការពារជាតិ នៃ ប្រទេសទាំងពីរ ដែលត្រូវតែអនុវត្ត ជា ដាច់ខាត។

កាលពីថ្ងៃទី ៧ មករា ឆ្នាំ ១៩៧៩ “ប្រិយមិត្តជិតខាងដ៏ល្អរបស់ខ្មែរ”នេះ បានមក ស្រោចស្រង់ខ្មែរ ឲ្យចេញផុតពីរបប ប៉ុល ពត ម្តងហើយ ។ “ប្រិយមិត្តជិតខាង”នេះ មិនមែនមកកំទេចតែកងកម្លាំង ប៉ុល ពត ទេ តែគេក៏មកកំទេចទាំង ប្រជាពល រដ្ឋ ខ្មែរ ដូចជានៅក្នុង “កម្មវិធី ក៥” ជាដើម ។ មិនត្រឹមតែប៉ុណ្ណោះ, នៅក្នុងឳកាសរដ្ឋប្រហារ កាលពីខែកក្កដា ឆ្នាំ១៩៩៧ “ប្រិយមិត្តជិតខាង ដ៏ល្អរបស់ខ្មែរ”នេះ ថែមទាំងបានឆ្លៀតកំទេចអ្នកស្នេហាជាតិខ្មែរ មួយចំនួនធំទៀតផង នៅ ពេលនោះ ។ “ប្រិយមិត្តជិតខាង”នេះ គេនៅតែបន្តកំទេច គណបក្សនយោបាយខ្មែរ ដែលមាន សក្តានុភាព អាចដណ្តើមយកអំណាច ពី គណបក្សប្រជាជនកម្ពុជាបានទៀតផង ។

ខ្មែរយើងនៅចាំបានថា កាលពីថ្ងៃទី ២៥ មីនា ឆ្នាំ ២០០៨, ឧត្តមសេនីយ ផុង កាង ថាញ់” រដ្ឋមន្ត្រីក្រសួង ការពារប្រទេស វៀតណាម បាន “អញ្ជើញ” លោក ទៀ បាញ់ ឧប្បនាយករដ្ឋមន្ត្រី និង រដ្ឋមន្ត្រីក្រសួង ការពារជាតិនៃប្រទេសកម្ពុជា ដើម្បី មកជជែកពិភាក្សា ។ នៅក្នុងឳកាស ពិភាក្សានោះ លោក ទៀ-បាញ់ បានអូសនាំប្រទេស កម្ពុជា ឲ្យដើរចូលជុចរបស់ វៀត ណាម ព្រោះហ៊ានធ្វើការសុំថាឲ្យវៀតណាម មកជួយការពារសន្តិសុខនៅកម្ពុជា បើសិនជាកម្ពុជាមាន បញ្ហាក្នុងពេល បោះឆ្នោត ខែកក្កដា ឆ្នាំ ២០០៨ កន្លងមកនេះ ។

ចៃដន្យអ្វីស្រាប់តែវិបត្តិព្រះវិហារ បានកើតមានឡើងនៅថ្ងៃទី ១៥ កក្កដា ២០០៨ ដោយកងទ័ព សៀមបានចូល មកលុក លុយ ក្នុងដីខ្មែរ ទី “វាលឥន្ត្រី” នៅជុំវិញ ប្រាសាទ ព្រះវិហារ ។